اورک

تورکو شعر , نثر ,ترجمه,ناغیل Şeir, Çevirmə, Nağıl : محمد حسام

باشلانیش: تورکو باخیش اینگیلیس دیللی شئعیرلره

 توركو باخيش

اينگيليس ديللي شئعيرلره

 

بيرينجي ايكي ديلده: «اينگيليسجه ـ توركجه»

 

شئعير چئويرمه توپلومو

محمد حسام

 

توركو باخيش اينگيليس ديللي شئعيرلره

محمد حسام

ناشر: نشر اختر

تيراژ: 1000 جلد/ چاپ اول 1387/ 112 صفحه/ رقعي

شابك: 8 ـ 149 ـ 517 ـ 964 ـ 978

مركز فروش: تبريز ـ اول خيابان طالقاني، جنب داروخانه رازي، نشر اختر

تلفن: 09141166897 و يا 5555393 ـ 0411

قيمت: 1500 تومان

 


ادامه مطلب
+ نوشته شده در  پنجشنبه 1389/04/24ساعت 22:19  توسط .....  | 

اؤن سؤز تورکو باخیش اینگیلیس دیللی شئعیرلره

اؤن سؤز

 

اوچ ايل قاباق حؤرمتلي دوستوم ايلقار جنابلاريندان «فن ‌شعر انگليسي» آدلي بير كيتاب آليب، يئني دونيالارلا تانيش اولدوم. آيرينتيلارلا اوخشاييشلارا توش گلديم سه، اوخشاييشلاري يوز قات آرتيق گؤردوم. «نه اوچون دين، ديل، كولتور، سوي و بو كيمي بؤيوك آيرينتيلار اولاراق، بونلارين شئعيرلري يامان بيزه اوخشايير؟» سورغوسو اوره‌ييمده دوغولدو.

آنجاق بو سؤزله راضيلاشديم: كوتله‌لرين سايديغيم آيرينتيلارينا باخماياراق، هاميسي انسانليق سؤزونده تام بيرديلر و فيكيرلري چاليشديران يوخسوللوق، اؤلوم، گؤز‌لليك، طبيعت و سئوگي سؤزلري بير آوروپالي يوخسا آسيالي انسانا، عئيني آنلام داشييير و بئله‌ليكله روحا (spirit) باغلي اولان مؤوضوعلاردا، آرتيق اوخشاييش گؤزه چارپير و كوتله‌لرين روحي دوروملاري، آرتيق ادبيات ساحه‌سينده آيدينلاشابيلر.

اؤرنك: «ليلي مجنون» پوئماسي ايله «رومئو ژوليئت» پييئسينين آراسيندا اولان اوخشاييشلار، يامان گؤز‌لدير: همن د‌رين سئوگي، همن د‌رين دوشمانليق عائله‌لر آراسيندا و نهايتده همن قورتولوش. سانكي بونلاري يازانلار، بير يئرده اوتوروب بيرليكده فيكيرله‌شيب، هر بيريسي اؤز ديلينده ياراتماغا باشلاييبلار.


ادامه مطلب
+ نوشته شده در  پنجشنبه 1389/04/24ساعت 22:17  توسط .....  | 

بییوقیرافی - شعر ائليزابئت بيشاپ

ائليزابئت بيشاپ
دوغوم: 1911 ـ نجي ايل، آمريكا

اؤلوم: 1979 ـ نجو ايل، آمريكا

 

بييوقيرافي

1911 ـ نجي ايل ماساچوسئت ايالتينده آنادان اولان ائليزابئت بيشاپ، بير ياشينا دولمادان، آتاسيني ألدن وئريب، آناسي د‌لي خانايا يوللاندي. اونون بؤيوتمه‌يي، بؤيوك آتاسي ايله بؤيوك آناسينا تاپشيريلدي.

1935 ـ نجي ايلدن 1937 ـ نجي ايللرين آراسيندا فرانسايا، اسپانيايا، آفريقايا، ايرلنده و ايتاليايا گئديب، بو سفرلرده گؤردوكلريني يازدي.

بيرينجي كيتابي «قوزئي، گونئي[35]» آديله 1949 ـ نجو ايلده ياييلدي. آرتيق «ماريان مور»  ـ ياشاييشيندا بؤيوك رول اوينايان، ياخين دوستو و ائليزابئت، اونون ترسينه اولاراق «اعترافي[36]» يوخ، آيدين شيوه‌ده اؤز ياشاييشندان يازماقدان واز كئچيب، آرتيق ظرافتله دونيادان آلديغي تأثيرلري دئيير. ياراتديغي ايماژلار، قيسسا و رئال اولاراق طبعينين اينجه‌ليگيني، آيدين گؤسترير.

آز يازاراق يايماغا دا هو‌س گؤسترمه‌ين ائليزابئت، ياشاييشيندا يوز شئعرين ياييب سا، تايسيز و پارلاق ايشلري، اونو آرتيق شؤهر‌ته يئتيريب، شاعيـرلرين شاعيـري تانينـدي. سون كيتابي «اوچونجو جغرافيا[37]» 1976 ـ نجي ايلده ياييليب، اونو چاغداش ادبياتيندا، گوجلو بير شاعير كيمي تانيتديردي.

 

1966 ـ نجي ايلده «فلوشيـپ» آكادئمي‌سينـين جايزه‌سيني آليب،
1966 ـ نجي ايلدن 1979 ـ نجو ايله قد‌ر اورانيــن باش رئيسي اولدو و نهايت 1979  ـ نجو ايلده...

 


ادامه مطلب
+ نوشته شده در  پنجشنبه 1389/04/24ساعت 22:8  توسط .....  | 

بییوقیرافی - شعر تی -ائس ائلییوت

تی -ائس ائلییوت

دوغوم: 1888 ـ نجي ايل، آمريكا

اؤلوم: 1965 ـ نجي ايل، اينگيليستان

 

بييوقيرافي

توماس استيرنس ائلييوت فيكيرلي، فرهنگ باشچيسي، شاعير، تنقيــدچي ايله پييئس يازان اينگيليس شاعيــري‌دير. 19 ـ نجــو عصـرين سمبـوليســتلري، 17 ـ نجي عصرين پييئس يازانلاري و ايتالييالي اورتا عصرلر (قرون وسطي) شاعيرلرينين تأثيرينده اولان ائلييوت، 1948 ـ نجي ايلده ادبياتدا نوبئل اؤدولو آلميشديـر. بو ايللرده باشقا يازيچيلارلا،اؤرنك اولاراق «ويرجينييـا وولف» ايله اينگيليسجه پييـئس يازماقدا يئتميشدير. سونرا آوروپايا گئديب اورادا «ائزرا پاوند» ايله گؤروشدو. پاوند، اونو لندنده قالماغا هو‌سلنديردي.

ائولندي سه چوخ تئز آيريلديلار. لنـدنده قالاركن، 1915 ـ نجي ايلده «جئي ـ آلفرئد پروفروك ون سئوگي ماهني سي[29]» آدلي شئعري ياييلدي. ياشاييشيني دولانديرماغا بانكدا، معلليمليكده، گوند‌ليك ياراشديرماقدا ايشله‌دي.

چوخلو اوسطوره، تاريخ، مذهب، كنايه و سمبول‌دان فايدالانماغا گؤره، يازيلاريني دوشونمك چتين‌دير. شئعيرلرينده درين سورغولار، انسان آرزيلاري و اجتماعي مدنيتين ذاتي حاققيندا دالغالانير.

1922 ـ نجي ايلده أن مشهور شئعريني ـ زاي اؤلكه[30] ـ آديله ياييب،  1932 ـ نجي ايلده آمريكايا قاييديب هاروارددا ايشه باشلادي.

1965 ـ نجي ايلده اينگيليستاندا اؤلدو.

   


ادامه مطلب
+ نوشته شده در  پنجشنبه 1389/04/24ساعت 22:6  توسط .....  | 

بییوقیرافی - شعر مارینا تئسوه تایوا

مارینا تئسوه تایوا
دوغوم: 1892 ـ نجي ايل، روسيه

اؤلوم: 1941 ـ نجي ايل، روسيه

 

بييوقيرافي

آتاسي مسكو بيلي‌يوردونون گؤز‌لليك هنرلر فاكولته‌سينين باش اوستادلاريندان، آناسي ياخشي پيانيست ايدي. خوشبخت عائله‌ده دوغولموش مارينا، چوخ تئز مصيبت‌لر داشينا توش گلدي. اون دؤرد ياشينا دولمادان، آناسي سلّ خسته‌ليگيندن اؤلدو. دونيايا علاقه‌سيزليگي آناسيندان پاي آلان مارينا دئيير: «ائله آناني الدن وئرمكدن سونـرا، منه يالنيز شاعير اولماق يولو قالميشدي». اون سگگيز ياشيندا آرتيق شؤهرته يئتيب، «ماكسيميلييان وولوشين» كيمي رسام و شاعيرين دوستلوغونو قازانميشدي. همن دوست مارينانين بيرينجي ادبي داياغينا دؤندو. اونون ساراييندا، «سئرگئي ائفرون» لا تانيش اولوب اونلا ائولندي.

1914 ـ نجي ايلدن قاباق، اشرافي ياشاديلار. ايكي قيزي اولدو. نؤكر، كنيز، اوشاق ساخلايان، آشپاز، صنعتكار قونشولار، آنجاق تام خوشبخت‌ليك. آمما او ايلده ايش دؤنوب بيرينجي دونيا دؤيوشو باشلاندي.

اري آغ قوشونا «ارتش سفيد»  قوشولوب عائله‌سيني بوشلادي. مسكونون ان قيتليغيندا، مارينا بالالاريني دولانديرابيلمـه‌ييب اونلاري اوشــاقلار ائوينه قويدو. 1919 ـ نجو ايلده بالاجا قيزي «ايرينا» همن يئرده آجيندان اؤلدو.

1922 ـ نجي ايلده، ارينين پراگ شهه‌رينده ديري اولماغيني بيليب اونا قوشولماق فيكرينه دوشدو. بئله‌ليكله اؤزونو اوزون سورگونلويه سالدي.

1925 ـ نجي ايلـده «گئورگي» آدلي اوغلو ان يوخسوللوقدا دوغولدو. ياشاييشي آغير كئچيردي ائله كي چئك‌لي دوستو «آناتئسكووا» دان يونگول يويولمالي بير كؤينك ايسته‌يير!. بير دوستونا يازير: «وارـ يوخوموز كؤمور، گاز، سود چؤره‌‌يي گؤرور تكجه آت اتي يئيه بيليريك.»

دونيانين بؤيوك قادينلاري،  بؤيوك بير كيشينين داياق اولماغينا سؤيكه‌نيبلر آمما مارينا يالقيزدير. ياشاييشيـنين چتينليكلرينده يالنيز شئعره سؤيكه‌نيـر. 1935 ـ نجي ايلده «بوريس پاستئـرناك» ا بير مكتوبدا بئله يازير: « فيكيرلشمه‌يه واختيم يوخدور بوتون واختيمي ائو ايشلري دولدوروب مني داغيدير. آنجاق يازيلاريمدا اؤزومم بيرده تاپسام آدام‌سيز كوچه‌لرده».

1939 ـ نجـو ايلده اوغلو ايله روسيه‌يه قاييدير. روسيه‌ ده جاسـوس تانينـان بو عائله‌دن اري بيرآي و قيزي «آلييا» ايكي آي سونرا توتولوب، اري ـ سئرگئي ـ اعدام اولور. آلمانيانين يوروشونده، مارينا اوغلو ايله «يئلابوقا» يا قاچيرلار.

آنجاق 1941 ـ ايلده اورادا اؤزونو بوغدو. قبري ايندييه قده‌ر گيزلين قاليبدير.

مارينانين شئعره باخيشي، ائميلي ديكينسونا تايدير. ائميلي دئيير: « قاني دامارلايمدا دوندوران هئچ اود قيزيشدايرا بيلمه‌‌ين، بير يازي اوخوسام،‌ اونا شئعيردئيرم. باشيمي بير يازي ايله ايتيرسم، يالنيز شئعير اوخوموشام .بو يوللار شئعري تانيماغا تكجه يوللارديلار».

«آنا آخماتووا» 1961 ـ نجي ايلده اؤلوم حاليندا «بيز دؤرد آدام» آديندا يازديغي شئعيرده پاستئرناك، ماندلشتام، مارينا بيرده اؤزونو، بير يولون يولداشي بيليب ماريناني شئعرين سونوندا گتيرمكله اوست اؤرتولو حالدا، اونو بو يولو قورتاران بيليبدير.

اونون شئعير مؤوضوعلاري، اؤز تجروبه‌لري دير. كاغاز اوستونه چكيلنلر سانسورسوز، تام حسي عاطفي تجروبه‌لردن يارانيرلار. بئله‌ليكله قوندارماليق اونون شئعرينده تاپيلمايير. اؤزو دئيير: «دوزگون شاعير هئچ زامان تاپشيريلميش فيكيرلري يازا بيلمز.»

اؤلندن سونرا شؤهره‌تي آمريكادا، سونرا اؤز اؤلكه‌سينده ياييليب دونياني بورودو و نهايت 20 ـ نجي عصرين سئچيلميش قادين شاعيرلريندن تانيندي.


ادامه مطلب
+ نوشته شده در  پنجشنبه 1389/04/24ساعت 22:5  توسط .....  | 

بییوقیرافی - شعر ائزرا لوميس پاوند

 ائزرا لوميس پاوند

دوغوم: 1885 ـ نجي ايل، آمريكا

اؤلوم: 1972 ـ نجي ايل، ايتالييا

 

بييوقيرافي

سمبوليستلرين آتاسي، ائزرا لوميس پاوند، ييرمينجي عصرين نقد ساحه‌سينده ده‌يَرلي، آوانگارد  آمريكالي شاعير و چئويرندير. اون بئش ياشيندا پئنسيلوانييا ايله هاميلتون بيلي‌يوردونــدا تحصيـل آلمــاقدايدي. قورتــاراندان سونرا، 1905 ـ نجي ايلدن ايكي ايله قد‌‌ر، رومان ديليني اؤيرنمه‌يه باشلادي. تئزليكجـه 1909 ـ نجو ايلده اؤزونو آغير ادبيياتچي كيمي  تانيتدي. 

لندنه گئـديب اورادا، ايكي آمريكالي قزئتــده ايشله‌دي. ايشينــده «ائلييــوت»، «ويلييــام باتلئر ييتـس» و «جئيمز جويس» ا اور‌ك باغلاييب ايماژيسم تئوريلرينين اير‌لي‌له‌مه‌يينده آرتيق چاليشيردي. پاريس‌ده«گئرترود استئين» بيرده «ائرنئست هئمينگوئي» ايله گؤروشوب 1925 ـ نجي ايل «بؤلوملر[28]» آدلي شئعير توپلومونو يايدي. اونون ان بؤيوك ايشي، فرهنگ تاريخيني آچيقلاماق اولموشدور.

ايكينجي دونيا دؤيوشونده ايتالييايا گئده‌ركن توتولوب، آمريكايا قايتاريلدي و د‌لي اولماق آديله خسته‌خانادا ياتيتديريليب  1972 ـ  نجي ايلده اؤلدو.       


ادامه مطلب
+ نوشته شده در  پنجشنبه 1389/04/24ساعت 22:4  توسط .....  | 

بییوقیرافی - شعر رابئرت فراست

رابئرت فراست
دوغوم: 1874 ـ نجو ايل، آمريكا

اؤلوم: 1963 ـ نجو ايل، آمريكا

 

بييوقيرافي

 

آوروپا آمريكانين بير سيرا بؤيوك سؤز تانييانلارين فيكريجه، معاصير آمريكا شئعرينين ان بؤيويو  فراست دير. ادبي ياشاييشينين باشلانيشيندا، يايانلار طرفيندن آلقيشلانماماغا باخماياراق اؤزونو محترم بير يازيچي كيمي تانيتديران «رابئرت»ين ايشلريندن بير سيراسي مونولوق دراماتيك يازيلارديلار. ياشاييشيندا اكينچي، باشماقچي، معلليم ايله گوند‌ليك ياراشديران اولوبدور. آتاسي ايلــه آناسـي مدير ايله معلليم ايميشـلر. ائوله‌نندن سونرا «سانفرانسيسكو» يا گئديب اورادا ژورناليسـت اولدو. عائله‌سي نييو اينگلنده قاييداندان سونرا آتاسي سل خسته‌ليگيندن اؤلدو. رابئرتين شئعيرلرينين چوخو، اورانين گؤز‌ل طبيعتينين حاققيندادير آناسي اونو يازماغا ماراقلانديريب، بو  يارديملارا گؤره، سئچيلميش محصيل آدي ايله مدرسه‌دن قورتولور. «دارموث» بيلي‌يوردوندا، بؤيوك آتاسينين ايسته‌يينين ترسينه  قاضي اولماغي بوشلاييب ژورناليست اولور.

1912 ـ نجي ايلده اينگيليستانا قاييدير آنجـاق اورادا يازيلاري، يايانلارين گؤزونو آليركن بيرينجي كيتابي ياييلير ـ بيـر اوغــلانيـن ايسته­یي[26] ـ بيـر ايل سـونرا ـ بوستونون قوزئيي[27] ـ و...

1915 ـ  نجي ايل بؤيوك دونيا شؤهر‌تي قازانميش رابئرت، آمريكايا قاييديب اون ايل  بير كند ائوينده ياشايير اونون شئعيرلري«ووردزوورث»ا تاي طبيعت حاققينداديرسا بؤيوك آيرينتيلاري دا واردير. فراست طبيعتله ياخيندان تانيشدير اونا رئال باخير حالبوكي ووردزوورث، اونو ايده‌آل گؤرور. دؤرد يول «پوليتزئر» اؤدولونه يييه دوران فراست 1963 ـ نجو ايلده بوستونون خسته‌خاناسيندا اؤلدو.

ياشاييشيني قيسسا شئعيرده بئله سؤيله‌يير:

«يازماق ايسته‌سه‌لر آلين يازيمي

قيسسا سؤزده اونو حاضيرلاميشام

قبریمین داشینا یازالارگره‌ك:

وورغونلا سئوگيلي ووروشماغيدير، منله دونيانين اوزون دؤيوشو».

 

And were an epitaph to be my story

I'd have a short one ready for my own.

I would have written of me on my stone:

I had a lover's quarrel with the world.

 


ادامه مطلب
+ نوشته شده در  پنجشنبه 1389/04/24ساعت 22:3  توسط .....  | 

بییوقیرافی - شعر توماس هاردي

توماس هاردي

دوغوم: 1840 ـ نجي ايل، اينگيليستان

اؤلوم: 1928 ـ نجي ايل، اينگيليستان

 

بييوقيرافي

توماس هاردي افسانه روايتلي، كند محيطينده كئچن رومانلا شئعيرلرينه گؤره تانينيبدير. بو استعدادلي شاعير، ويكتورييا دؤورونون بؤيوك شاعيرلرينين سونو، آدلانيبدير.

سوواخلي كند ائوينده دوغولان توماس، بئله‌نچي محيطلري اؤلومونه قد‌ر اونودابيلمه‌دي. يالنيز سگگيزدن اون آلتي ياشينا قد‌ر كلاسيك درس اوخويوبدور. يازديقلاري يايانلاري راضي‌ سالابيلمه‌ييب سه يورولماز توماس، 1867 ـ نجي ايلده «دورچئستئر»ه قاييديب رومان يازماغا باشلادي.

بيرينجي رومانينين آدي «اومودسوز درمانلار[24]» اولدو. اوشاقلاري اولمادان 1912 ـ نجي ايلده قاديني اؤلدو. اون ايكي ايل، اؤزو ايله ووروشوب «توتقون يهودا[25]»ني يازاراق اؤز ايچينده اولان دؤيونتونو، قورخمادان باييرا تؤكدو. اوتوز ايله‌دك، مين شئعير يازدي. ناپلئونون دؤيوشلري مؤوضوعسوندا بير كامل حماسي شئعيـر يازاراق 1904 ـ نجو ايلدن 1908 ـ نجي ايله‌دك اوچ بؤلومده بوتون يازديقلاريني يايدي.

اونون شئعيرلري، ويكتورييا دؤورو ايله ييرمينجي عصرين مدرنيسمي آراسيندا، بير كؤرپو كيمي‌دير. قئييم بؤلوملر و استانزا يارانيشلاري، اونو شوبهه‌سيز ويكتورييا دؤورونه باغلاييرسا غئير شاعيرانه ديل و تك قافيه‌لر، مدرن شئعرينه تاي‌دير آنجاق 1928 ـ نجي ايلده اؤلدو.

 


ادامه مطلب
+ نوشته شده در  پنجشنبه 1389/04/24ساعت 22:1  توسط .....  | 

بییوقیرافی - شعر ائميلي ديكينسون

ائميلي ديكينسون

دوغوم: 1830 ـ نجو ايل، آمريكا

اؤلوم: 1886 ـ نجي ايل، آمريكا

 


بييوقيرافي

 

ائميلي ديكينسون، شئعيرلري آغير معنا داشييان آمريكالي شاعيردير  عؤمور بويو دونيايا علاقه‌سيزليگي، يازديقلاريني يايماماق، دينج يئرلري گزمك، اونا «نييو اينگلنـدين صوفي سي[19]» «اوسطوره» «آغ گئييملي قادين» «يالقيز ملكه» لقبلريني قازانميشدير. مذهبي اصيل عائله‌ده، ايكينجي دوغولان اؤولاد، ائميلي اولموشـدور. آتـاسي، 1835 ـ نجـي ايلدن 1872 ـ نجي ايله قد‌ر آمهئـرست كالئجينين صاحابلارينـدان اولوب  1835 ـ نجي ايلدن
1855 ـ نجي ايللرين آراسيندا  آمريكانين سنا مجليسنسن نوماينده‌سي اولموشـدور. آنجاق بو آتانين هئيبتلي آغير كؤلگه‌سي، ائميلي‌نين ياشاييشينا حؤكوم سوردو. ائميلي تئزليكجه وزن ايله قافيه‌ني تانييب 1850 ـ نجـي ايلــدن يازماغـا باشـلادي و 1858 ـ نجي ايله قدر چوخلو شئعيـرلر يازدي.

بيرينجـي شئعيـرلري كلاسيكدير و «رالف والدو ائمئرسون[20]» و «ائميلي برونته[21]» نين آرتيق تأثيرينده اولوبدور. بو ايللردن سونرا ديلده و يازي سبكده، يئني تجروبه‌لره ياناشير. يازيلاريندا، نقطه‌دن آز فايدالانيرسا « ـ » ايشاره‌سيني يامان سئوير فيكير يوخسا زامان دايانماغيني گؤستريرمه­یه. شئعيرلري قيسسا دير آنجاق اوخوجوسونا شيددتلي تأثير ائتمه‌يه، نحو علمي ايله اوينايير. غاليب مؤوضوعلاري سئـوگي، اؤلوم و طبيعت دير. اؤز تك‌لييينده، مدرن شئعيرلر نورمالاريندا يازان بو شاعير، آتاسينين كؤهنه كند ائوينده، ياشاييبدير. «هئلئن جكسون[22]» ـ حؤرمتلي دوستو ـ شئعيرلريني يايماغا اونو هو‌سلنديرير آمما ائميلي بو ايشه ماراقلانمايير چونكو بو ايشي «ذهني دويغونو حراجا وورماق» بيلير و يازييا «ال گزديمه‌ني» «جراحليق» سانير. بوتون عؤمرونده تك قاليب ائولنمه‌دي اؤزو دئيير «شايد يالقيزراق اولام بو يالقيزليق اولماسا». يالنيز يئددي شئعري تانينماز آدلا ياييلير. گؤز خسته‌لييي اونو تك‌ليــيه ايته‌له‌يير 1870 ـ نجي ايلده ياخين دوستلاري«وادزوورث5» «هولند[23]» بيرده آتاسي، آناسي، قارداشينين اوغلو اؤلركن، ائميلي آرتيق يالقيزلايير. 1886 ـ نجي ايلده، اؤلوموندن سونرا باجيسي، 1700 دن چوخ شئعيرلريني بير بيرينه تيكيلميش پارام ـ پارچا كاغازلاردا  تاپيب يايير.

 


ادامه مطلب
+ نوشته شده در  پنجشنبه 1389/04/24ساعت 22:0  توسط .....  | 

بییوقیرافی - شعر ويتمن

 ويتمن

دوغوم: 1819 ـ نجو ايل، آمريكا

اؤلوم: 1892 ـ نجي ايل، آمريكا

 

بييوقيرافي

ويتمن يقين آمريكا شاعيرلرينين بؤيوكلريندن بيري دير. اونون سبكي، دانيشيق ديلينه ياخينلاشان و بيرلشميش حادثه‌لر مؤوضوعسوندا اولان، آمريكانين قئييم سبكي دير.

شئعيرلري اؤز يوردوندان قاباق، آوروپادا شؤهرته يئتن شاعير، بير نجار آتـانين، دوققوز اؤولادينين ايكينجــي‌سي دير. 1827 ـ نجي ايلده «ايكي سويلو[16]» ايله باشقا ناغيللاريني ياييب  1835 ـ نجي ايلدن گوند‌ليك ياراشديران اولدو.

۱۸۵۰ ـ نجي ايلده بيرينجي آدليـم ايشيني «چيمن يارپاقلاري[17]» آديله اؤز پولو ايله يايدي ـ اون ايكي آدسيز شئعير ـ. بو شئعيرلر بؤيوك ده‌ييشيكليك يوخسا دوز دئسك پارتلاييش ياراديب شئعير راديكاللارينين گؤزونو توتوب كؤهنه آدليم يازيچيـلارين آجيغينـا گلدي. آچيق، د‌رين روحي ـ عاطفي شئعيرلر، اونا چوخلو دوشمان قازاندي ائله كي ايشدن ائشييه  اؤتورولدو. داها  كيتابي  ياييم اوزو گؤرمدي. يالقيزلايان  عوصيانكار شاعير، عؤمورونون سونوندا سله‌ده كيتابلاريني ساتماقلا كئچينيردي سه اؤلومونه قد‌ر يازيلاريندا بير كلمـه‌ني ده سيلمه‌يه راضيلاشمادي. اؤلوموندن سونرا دا «چيمن يارپاقلاري» سانسور اليندن قورتولا  بيلمـه‌دي  ائله‌كي 1948 ـ نجي  ايلده كانادانين «كوبئك» شهرينده بو كيتابين نسخه‌لريني داغيديجي، آبيري ضيددي اولماق آدي ايله ييغديلار. «جسماني عيرفان» سؤزو، دوز اولورسا، اونون شئعيرلرينه تام اويغون آددير.

بوندان قاباق ائمئرسون، هاثورن، آلئن پو و لانگ فئلو هونر آللاهلاري اولاراق شئعيرلري ياشاييشين گؤز‌لليكلريني آراشديريب دقيق هندسي قاعده‌لرله يازيليرديلارسا ويتمن اسكي اجتماعي ادبي ياسالارين قارشيسينا چيخيب بوتون دووارلاري بيردن داغيددي. شئعير ديليني يونگوللشديريب كوتله ديلينه قاتماغي چوخلاريني آجيقلانديريبسا شئعير دونياسيني كوتله‌لرله باريشديردي. «ويتمن‌»جه شئعير يالنيز كوتله‌لره يازيلمالي‌دير «ويتمن»ه تاي اومانيست شاعير، ادبيات تاريخينده آزدير. شئعيرلري وطن مؤوضوعسوندا اولاراق اونلاردا  ائروتيك ايزلري آیدین گؤزه چارپير. داخيلي دؤيوش ايللرينده، ايكي طرفين آراسيندا باريش ياراتماغين اومودو يازيلارينـدا آرتيق دالغـالانير. سون ايللرده ياشاييشيني آراشديران بير كيتاب يايدي «آياقلانميش يوللارا اؤتري قاييديش[18]».

آنجاق 1892 ـ نجي ايلده آياقدان دوشدو. قويلاناندا اوجا سسله شئعيرلريله بيرليكده افلاطون، بودا، كنفسيوس، انجيل، قرآن و اَوِستادان سؤزلر اوخونوردو.

 


ادامه مطلب
+ نوشته شده در  پنجشنبه 1389/04/24ساعت 21:59  توسط .....  | 

بییوقیرافی - شعر آلفرئد لورد تئنيسون

آلفرئد لورد  تئنيسون

دوغوم: 1809 ـ نجو  ايل، اينگيليستان

اؤلوم: 1892 ـ نجي ايل، اينگيليستان

 

بييوقيرافي

آلفرئد لورد  تئنيسون، ويكتورييا دؤرونده رومانتيك سبكينين بؤيوكلريندن دير. آيري ـ آيري مؤوضوعلاردا شئعيرلر يازيب، يازي شيوه‌سينده «لورد بايرون» دان تأثير آليبدير. طبيب آتاسينين دؤرونجو اوغلو اولان آلفرئدين،  بيرينجي معلليمي آتاسي اولوب سونرالار كمبريج بيلي‌يوردوندا تحصيل آليبدير. آمما قورتارمادان آتاسينين اؤلومونه گؤره كمبريجي بوشلاييب، اون بئش ياشيندا نئچه پييئس ايلـه «ايكي‌قارداش» آديندا بير حماسي شئعيريايدي. بيرينجي بؤيوك ايشي 1830 ـ نجو ايلده ياييلاركن،  همن ايلده اسپانييانين پارتلاييش قوشونونا قوشولدو. ايكي ايل سونرا ايكينجي شئعير توپلومونو نئچه گؤز‌ل پييئس ايله ياييبديرسا، ياخشي دوستو ـ آرتور هالمن ـ ين اؤلومو، اونو اون ايله قده‌ر يازماقدان آييردي. يئني يازماغي « هالمن»ين  مدحينده باشلايييب، 1850 ـ  نجي ايلده بؤيوك شئعريني اونا اتحــاف ائتدي. قادينلار حاققيندا «پرنسئس» كيتابيني يازيب « وودوورث»دان سونرا اينگيليستانين، شاعيرلرين پاشاسي «ملك‌الشعراسي» اولدو. اسكي افسانه‌لره اور‌ك باغلاييب، ياشاييشينين سونوندا، درام يازماغا باشـلاميشــدي. اونـون  ايسته‌يينــه   گـؤره، سونونجو شئعـري «چاخيرليقدان كئچمك[15]» آديله، شئعير كيتابينين سونونا يازيلدي.


ادامه مطلب
+ نوشته شده در  پنجشنبه 1389/04/24ساعت 21:57  توسط .....  | 

بییوقیرافی - شعر لانگ فئلو

لانگ فئلو

دوغوم: 1807 ـ نجي ايل، آمريكا

اؤلوم: 1882 ـ نجي ايل، آمريكا

 

بييوقيرافي

هئنري لانگ فئلو، سئويملي، اير‌لي‌لميش آمريكالي شاعيردير. ياشاييشين آرزيلاري و مصبيت‌لرينه گؤره، يونگول و فني يازماق سبكيني سئچيب، بو تهر يازماغي ياخشي باجاريردي. آتاسي بؤيوك قاضي ايميش. اونو«پورتلند» آكادئمي و«بوودوين» كالئجينين خصوصي مدرسه‌سينه يوللادي. سونرالار «بوودوين»دا، يئني ديللر تدرسينه باشلاييب، بيرينجي كلاسي، آوروپا فرهنگي اولموشدور.  فرانسا، اسپانييا و ايتالييا فرهنگلري ايله، آرتيق  سفرلرينده تانيش اولاركن، يازيلاریندا اونلاردان فايدالانيبدير. 1834ـ نجي ايلده  هاروارددا اولوب،  ايكينجي آوروپا سفرينه يوللانـاركن، اينگيليستـان، سوئد و هولندي گؤروب  آلمانين رومانتيسم مكتبيندن ياشاييشينين چيراغي سؤنركن، اونو يامان درده سالدي. ايكينجي ائولنمه‌يي ده، اون سگگيز ايل سونرا، قادينين دهشتلي يانماغي ايله سونا چاتدي.

1839 ـ نجو ايلده بيرينجي شئعري ـ گئجه‌نين سسلري[12] ـ آديله ياييلاندان ، سون شئعرينه قد‌ر ـ دنيز قيراغينداكي يولچوخانانين افسانه‌سي[13] ـ كوتله‌لر ايچره ياخشي ماراقلاندي. 1854 ـ نجو ايلدن هارواردي بوشلاييب، اؤزونو يازماقلا ساخلاييبدر. آلتميش بير ياشيندا، سون آوروپا سفرينـده، «آكسفـــورد» ايلـه «كمبريج» دن افتخار رتبه‌سيني آليب، اون دؤرد ايل سونرا سون شئعير توپلومونو «بندرده[14]» آدي ايله ياييب، نئچه هفته سونرا خسته‌له‌نيب اؤلدو.

 


ادامه مطلب
+ نوشته شده در  پنجشنبه 1389/04/24ساعت 21:56  توسط .....  | 

بییوقیرافی - شعر پئرسی شئلی

پئرسی شئلی

دوغوم: 1792 ـ نجي ايل، اينگيليستان

اؤلوم: 1822 ـ نجي ايل، ايتالييا

 

بييوقيرافي

شئلي اينگيليستانلي اومانيست و دوزگون سئوگي آختاران شاعيردير ائله‌ كي رومانتيك قالخيشينين بؤيوك يازيچيلاريندان اولوبدور. انسان آزادليغيني بوغان بوتون توپلانتيلاردان اوزاق گزيب، يالنيز سئوگيني، انسانين دردلرينه درمان بيليبدير. شئلي وار ـ دؤولتلي عائله‌نين بؤيوك اؤولادي ايدي.

1804 ـ نجو ايلده «ائتون كالئج»ه يازيليب اوتانجاق، دؤيوشچول و حساس طبعينه گؤره «د‌لي شئلي[10]» آدلاندي. 1810ـ نجو ايلده آكسفوردا يازيليب سا، آللاهي دانان بير يازيني يايماغا گؤره ائشييه اؤتورولدو.

يازيب اوخوماغا داوام ائديب، بيرينجي اوزون ايشيني ـ پينتي  ملكه[11] ـ  آدلا، بير فلسفه اوستادينين تأثيرينده 1813ـ نجو ايلده يايدي. بو يازيدا رسمي دينين قارشيسينا چيخيب ملكه پئرسوناژي، انسان روحونون كئچميشده و گلجكده كليسا الي ايله جهنمه دؤنمه‌ييني گؤسترير كي تكجه اومودو اومانيسمه باغلانير.

ياشاييشدا ياخشي كيشي اولماييب اسكيكليگي، آرواد ـ اوشاغينا يئتيشمه‌مه‌يي، قاديني اؤزون اؤلدورونجه داوام ائدير. «لورد بايرون» لا دوستــلاشيب 1819 ـ نجو ايلده قيسسا شئعيرلرينـي يايدي. «بايـرون»  و «كيتس» ايله اينگيليستانين رومانتيك قالخيشينين بؤيوك‌لريندن اولدولار. دويغولاري، ياشاييشينين كؤمه‌يي‌دير و اينامي شخصي آزادليغينا، قيسسا ياشاييشيني زنگینلشديريب‌دير.

اوتوز ياشينا دولمادان سودا بوغولدو. يازيلارينين چوخو، اؤلندن سونرا 1824 و 1839 ـ نجو ايلده ياييلدي.

  


ادامه مطلب
+ نوشته شده در  پنجشنبه 1389/04/24ساعت 21:54  توسط .....  | 

بییوقیرافی - شعر ویلییام ووردزوورث

 ویلییام ووردزوورث

دوغوم: 1770 ـ نجي ايل، اينگيليستان

اؤلوم: 1850 ـ نجي ايل، اينگيليستان

 

بييوقيرافي

رومانتيك سبكينين ليدئرلريندن اولان ووردزوورث، شئعرينده، طبيعتدن هيجانلي ايماژلاردان فايدالانماغا گؤره آرتيق تانينيبدير.

آتا ـ آناسي اورتا يوخسا آشاغا درجه ده ياشاياركن، ويلييام سگگيز ياشينا دولمادان آناسي، بئش ايل سونرا آتاسي اؤلوب، عمي‌لري  اونلارا يارديم اولدولار. بونلارين ال آچيقليغي، ويلييامي 1787 ـ نجي ايلده مدرسه‌يه، سونرا كمبريج  بيلي­ يوردونا يوللاييب 1791 ـ نجي ايلده اورادان قورتولدو. بو ايللرده فرانسايا گئديب اورانين ديليني اؤير‌نيب فرانسا پارتلاييشينين يامان تأثيرينده اولاراق، دؤرد ايل سونرا اينگيليستانا قاييتدي. بو اوضاع اونو فلسفه‌يه ساري ايته‌له‌دي.

اينگيليستاندا «ساموئل تايلور كولئريج» ايله گؤروشوب دوستلاشديلار. 1798 ـ نجي ايلده ايكي يولداش «ليريك تصنيف‌لري[9]» ياييب اينگيليستانين ادبياتيندا بؤيوك داياناجاق ياراتديلار. بو تأثيرين ان بؤيوك حيصه‌سي ووردزوورثون اولاراق، قورو خشن دستوري ادبياتدان اوزاقلاشيب رومانتيسم شكيل ياراتماغا، گئنيش مئيدان آچدي. ايشينده آداملاري سئومك، قورتولوش آختارماق و طبيعتـه اعلي درجـه‌ده قوللوق ائتمـك آشار ـ داشاردير.

اونون شئعري، يونگول آيدين و سؤزلرين دوزگون سئچيمينه گؤره، بو گون دونياني ماراقلانديرير.

اؤلوسو «گرئسمئر» كليسه‌سينين حيه‌طينده قويلاندي.

  


ادامه مطلب
+ نوشته شده در  پنجشنبه 1389/04/24ساعت 21:52  توسط .....  | 

بییوقیرافی - شعر ویلییام بلئیک

ویلییام بلئیک

 دوغوم: 1757 ـ نجي ايل، اينگيليستان

اؤلوم: 1827 ـ نجي ايل، اينگيليستان

 

بييوقيرافي

تخيل‌لي، رسام، حكاك و شاعير ويلييام بلئيك، اؤز الي ايله،  بير سيرا ايشلرينه، رسيملر چكيبدير. اصيل خيال و ياراتماغا ماليك اولان ويلييام، ديريلييينده تانينماييب يوخسوللوقدا اؤلوبدور. آتاسي، اوغلو دؤيوشچول اولدوغو دئيه، اونو مدرســه‌يه آپارماييــب، ائوده اونا يازيب ـ اوخوماقدان آرتيق ياخشي فلسفه دوشوننه قد‌ر اؤير‌ديـبديـر. همـن ايللــردن ويلييام،  الهام دونياسينـدا  نفس چكيب «تانرينين گوجونو گؤرور‌م» دئيه هوشدان گئديبدير. ملك‌لرله دولانماغينا آياق ديريييب، «حزقيل» پيغمبري بير  آغاج  آلتيندا  گؤردويونو  دئييبدير. بير صنعتكار اولماق وئرگي‌سينـه دوغما ماليــك ايدي. اون ياشيندا«هئنري پارس» آدلا، رسامليق كلاسينا يازيليبدير و نئچه ايل سونرا، شئعره اوخشار طرحلريني[6] ياييب اؤزونو«جاكوب بوهم» ـ بير آلمـانلي صوفي ـ نين بيرده «ائمانوئل سوئدئنبئرگ» ین فلسفه‌سينين آرتيق تأثيرينده اولماغيني آيدينلاديبدير. اون دؤرد ياشيندا حكاكليق اؤير‌نمه‌يه باشلاييب يئددي ايل سونرا باجاريقلي بير حكاكا دؤنموشدور. اوستادلاري ايله چيرپيشيب، هنرين سلطنـتي آكادئمـي‌سيندن ائشيـيه اؤتورولركن، 1784 ـ نجو ايلده بير ياييم ائوي آچيبدير.

قادينينا يازيب ـ اوخوماق و رسامليق اؤير‌ديب سه قاديني الهام دونياسيندا اولان چاغلاردا كي گاهدان نئچه ساهات ايدي، ويليياما يارديم ائدردي.

1789 ـ نجو ايلده «معصوميت ماهني‌لاري[7]» آديندا ان سئويملي ايشيني يايدي. بئش ايل سـونرا، كامل آدامين وارليغينا داياناراق «تجروبه ماهني‌لاري[8]»ني ياييب، تجروبه‌سيز، آدامين روحو دوزگون معصوميته يئتمه‌مه‌يينه ايناندي. شئعيرلري ايكي بؤلومدور: سمبوليك، ادبي و بونلارين هر ايكيسي انسان روحونا عاييددير. يازيلاري اوخوجولاري و يايانلاري راضي‌لانديرماماغينا گؤره، عؤمرونو تك‌ليكده سوروب يالنيز اؤلندن سونرا بؤيوك و محترم بير صنعتكار كيمي دونيادا آدلاندي.  


ادامه مطلب
+ نوشته شده در  پنجشنبه 1389/04/24ساعت 21:50  توسط .....  | 

بییوقیرافی - شعر شئکسپییئر

 شئکسپییئر 


دوغوم: 1564 ـ نجو ايل، اينگيليستان

اؤلوم: 1616 ـ نجي ايل، اينگيليستان

 

بييوقيرافي

ويلييام شئكسپييئرين، ان بؤيوك پييئس يازان اولدوغونا باخماياراق اونون ياشاييشيندان آزجا  تانينيب، دوغوم ايله اؤلوم تاريخلري ده ظن ايله يازيليبدير. آتا ـ آناسينين سگگيز اؤولادينين اوچونجوسو اولان ويلييام، شايد كندلرينين مدرسه‌سينده تحصيل آليب، بؤيوك اوغلان اولدوغونا گؤره آتاسينين ايشيني  ـ تجارتي ـ داوام ائتمه‌لي ايديسه قصاب شاگرد، سونرا مدرسه مديري اولدو.

بير اكينچي قيزي ايله ائوله‌نيب 1592 ـ نجي ايل لندن تئاتريندا بؤيوك يئر توتاراق «هئنري رييوتئسلي[1]»نين دوستلوغونو قازاندي ـ ساوتهامتونون اوچونجو كنتو ـ.

آلقيشلانماغينا باخماياراق بؤيوك شؤهرته يئتمه‌يي اؤلوموندن سونرا باشلادي. او ايللرده اينگيليستانين نوماييشي بؤيوك آوروپا نوماييشينين، كاسيب عمواوغلوسو كيمي تانينميشديرسا، ويلييام بيرينجي ملكه ائليزابئت ايله بيرينجي شاه جئيمزين علاقه‌سيني قازانماقلا، وار ـ دؤولتلي بير صنعتكاريدي.

يازديقلاريني دؤرد بؤلومده آراشديرماق اولار:

1 ـ اؤزونه خصوصي سبك ايله ديل تاپماق

2 ـ تاريخ مؤوضوعسو اؤرنك اولاراق : ايكينجي ريچارد[2]

3 ـ تراژئديلر اؤرنك اولاراق: مكبئث[3]

4 ـ كمدي ـ تراژئدي

انسان طبعيني ساده دوشونمه‌لي گؤسترمک و ديلينين گوج و گؤز‌للييي، اونو اينگيليس ادبياتينين ان بؤيوك يازيچي‌سي ائله‌ييبدير. اوتوز يئددي پييئس دن باشقا، يوز اللي دؤرد غزل و ايكي روايي شئعير يازيبدير. غزللري، ياشاييشين باشقا باشقا ايماژلاريني گؤسترمكده‌دير : شخصي باغلانتيلار، زامانين گئديشي و انسانلا طبيعتين باغلانتيسي.

ياشاييشينين سون ايللرينده عائله‌سي ايله  اولماغي، ايشدن يئي توتوب، 1616 ـ نجي ايلده اؤلركن، استراتفورد كليسه‌سينين حيه‌طينده قويلاندي.

 


ادامه مطلب
+ نوشته شده در  پنجشنبه 1389/04/24ساعت 21:47  توسط .....  | 

قرآن کریمین تورکجه ترجمه لرین نمونه لری

 

باغيشلايان و مؤهروبان اولو تانري آدي ايله

سؤيله آللاه [ يالنيز ] بيردير

[ يالنيز ] آللاه نيازسيزدير

دوغماييب‌دير دوغولمازدير

تايي اولماز اولمايان‌دير ، آللاه بيردير .

 

 

باغيشلايان و مؤهروبان اولو تانري آدي ايله

تون‌به‌تين دوشركن ، اللري اوزولسون ابولهبين

قازانديغي دؤولت قورتارابيلمه‌دي [ اونو اؤلومدن ]

[ ظاليم بيره‌لر تك داراشار ] جانينا آلاولو اودلار

قاديني بو اودون داها آليشديران اودونچوسودور

خرما يارپاغيندان بوينوندا بير ايپ وار [ اؤلوم توخوشلو ] .

 

 

باغيشلايان و مؤهروبان اولو تانري آدي ايله

بوتون دونيالاري بئجردن آللاها شوكورلر اولسون

چوخلو باغيشلايان و مؤهروبان دير

قيامت گونونون يييه‌سي اودور

سنه قوللوق ائديب ، كؤمك ايسته‌ييريك يالنيز تك سندن

يوللاندير بيزلري ان دوزگون يولا

اونلارين يولونا كي نعمت وئرميسن [ آماندير قورخورام ]

حيرصين ياغانلارلا چاشانلار يولونا دوشمه‌يه قويما .

 

 

باغيشلايان و مؤهروبان اولو تانري آدي ايله

سؤيله [ آنجاق ] سؤيكه‌نيرم آداملاري بئجردنه

آداملارين پاشاسينا

آداملارين آللاهينا

شئيطانلارين اوشه‌نديرن قاداسيندان

آداملارين اوشه‌نديرير اوره‌كلرين

آدام‌دان دير يوخسا جن‌دن .

 

 

باغيشلايان و مؤهروبان اولو تانري آدي ايله

سؤيله آي كافيرلر !

سيز قوللوق ائده‌نه ، قوللوق ائتمه‌رم

سيزي ده بيليرم قوللوق ائتمه‌ين‌سيز منيم تانريما

آللاهلارينيزا دا ، من ده قوللوق ائدن آنجاق دئييلم

 سيزي ده بيليرم قوللوق ائتمه‌ين‌سيز منيم تانريما

سيزين دينيز سيزده و منيم دينيم دير آنجاق اؤز دينيم .

 

 

باغيشلايان و مؤهروبان اولو تانري آدي ايله

ان بؤيوك نعمتي ، بخش ائتديك سنه

تانرينا ناماز قيل قوربانليق ائله

نسلي كسيلن دير ، ديل ياراسي ووران [ دين دوشمانينين ] .

 

 

باغيشلايان و مؤهروبان اولو تانري آدي ايله

گؤرمه‌دين مي ، سنين تانرين فيل قوًشونون نئيله‌دي ؟

اونلارين مي فئلين يئله وئرمه‌دي ؟

و ابابيل قوشلاريني اونلار اوچون يوللادي

يانديريجي پالچيقدان داش ياغديرديلار قوًشونا   

آنجاق قيلدي گؤوشه‌نيلميش سامان كيمي  اونلاري .

 

 

باغيشلايان و مؤهروبان اولو تانري آدي ايله

قريش ايچره دوستلوق سئوگي ياراتماغا

يايلاقلارادا قيشلاقلاردا دوست قالماغا

آنجاق گره‌ك ، كي بو ائوي بئجردنه قول اولسونلار

آجليقلاردان دويورانا ، قورخولاردان قورتارانا .

 

 

باغيشلايان و مؤهروبان اولو تانري آدي ايله

قاتيب باشينيزي [ پول ايله اؤولادين ] چوخلو ييغماسي

[ اهلي‌ني ] گؤرونجه [ دار ] قبيرلرين

تئز بيله‌جك‌سينيز بئله‌نچي دئييل

آنجاق بئله دئييل تئز بيله‌جك‌سينيز [ قبرين دارليغين ]

يقين بيلسه‌يدينيز ؟

جهنم [ اودونو ] گوره‌جك‌سينيز

يقين گؤزو ايله ، شوبهه‌سيز اونو گؤره‌جك‌سينيز

[ بوتون ] نعمت‌لردن سوروشولاجاقدير ، آنجاق او گونده .

   

 

+ نوشته شده در  چهارشنبه 1389/04/09ساعت 11:20  توسط .....  |