اورک

تورکو شعر , نثر ,ترجمه,ناغیل Şeir, Çevirmə, Nağıl : محمد حسام

عادلانه بؤلمک

 عادلانه بؤلمک

 گونلرین بیر گونونده، شاه عابباسین دوربونونده: بیر شئر، قورد، تولکو یولداش اولوب بیرلیکده اوولاییب بیرلیکده یئمه­یه سؤز وئردیلر. همن گون الی دولو اولوب بیر اؤکوز،قویون، تویوق اوولادیلار. آرالیغا آتیب شئر قوردا « بؤلوشدور بونلاری قاراداش! یاخشی عادلانه بؤلمه­یینی     ائشیتمیشم » دئدی.

- شئر آغا! بؤیویوموز سن سن، بونلارین ان بؤیویو- اؤکوز- سنین اولسون. سندن کیچیک منم، قویون دا منه یئتر. تویوق تولکونون اولسون. هامیدان کیچیییه کیچیک یئتر آنجاق.

شئر بیر نعره تپیب باشینی قوپارتدی قوردون، سونرا « سن بؤلگینن تولکو قارداش!» دئدی.

تولکو بیر آز دوشونوب:

- قویون، سحر یئمه­یین اولسون

   ناهارین قوربان! اؤکوزاولسون

   شام یئمه­یین تویوق اولسون

   تولکو سنین نؤکریندیر. یاندا دوروب باخار اولسون.


ادامه مطلب
+ نوشته شده در  دوشنبه 1388/10/21ساعت 16:8  توسط .....  | 

دنیزلر قیزی

ایچیمده بیر دئو دانیشیر

نعره تپیر

دان آلیشیر.

دنیزلر قیزی اسیردی اونا.

گؤزلری باخیر منه.

توو منیم قئیرتیمه

قورتارماسام

 اونو

اؤزومو

سنی

دئولرین الیندن.

+ نوشته شده در  دوشنبه 1393/02/22ساعت 19:32  توسط .....  | 

من سن

اؤزومو تانیماییرام

تانییاندان سنی.

قارانلیقدان آی پارچاسی 

گولور منه.

نه گؤزلم من ،سن

قیزیل گولدن

پنجره قیراغیندا 

یووا تیکمیش گؤیرچیندن.

اوره ییم اسیر 

سنی گؤرمه یه .

سئویرم سنی 

مین ایللیک سئودا.



+ نوشته شده در  دوشنبه 1393/02/22ساعت 19:22  توسط .....  | 

سن گلمه

آلما دئسم

گلمه گؤزل!

من اؤزوم سنی گتیرملی یم.

آلمالییام سنی دئولرن الیندن.

هر دونا گیریرلر

گاهدان تانیماقدا اولماییر اونلاری.

آمما چتین دیرسه ده

من سنی گتیرمه یینجه 

اوتورمایاجاغام

اؤلمه یه جه یم.

آخی مینلر ایلوی سئویرم سنی.

+ نوشته شده در  دوشنبه 1393/02/22ساعت 19:15  توسط .....  | 

مین ایللیک سئودا

ایتمیشدیم دونن

سیزلاییردی چاپیلمیش قول-قانادیم

قانا بلنمیشدی بوتون دونیالار.

ائلچی یوللادین 

بیر

ایکی...

آلتی.

منی اوخشاماغا

گلیردین 

ائله بیل.

گولدون اوزومه

هونکور-هونکور آغلادیم دویونجا.

سئویرم سنی مین ایللیک سئودا.

+ نوشته شده در  دوشنبه 1393/02/22ساعت 18:52  توسط .....  | 

آللاه گولور

دونیا گؤزلدیر گؤزلیم!

سن وارسان

شعر وار

سئوگی دالغالانیر

دامدان - دوواردان.

آللاه باخیر 

گوله-گوله

منه

سنه

یاشا دئییر اؤز-اؤزونه.

+ نوشته شده در  دوشنبه 1393/02/22ساعت 18:44  توسط .....  | 

آلوو

گؤزلریندن داغ دویغولار 

جالاندی گؤزومه

اوره ییمه.

پؤشلندی دونموش یاناغیم.

او گوندن آلیشماق

یاپیشیر منه.

+ نوشته شده در  دوشنبه 1393/02/22ساعت 18:37  توسط .....  | 

تبریز

دلی - دولو آداملاریم وار

دوشمانلاریم قاطار-قاطار.

الیمدن توتان آز

آیاغیمدان چکن...

آمما دیری یم من

اؤلدوره رم اؤلومو

قاققیلدایارام دونیا وارکن.

آدام باباز منله یاشاییبدیر.

من تبریزم.


+ نوشته شده در  دوشنبه 1393/02/22ساعت 18:33  توسط .....  | 

تیرختور

افسانه آختاریرام 

هله مدرن اولمامیشام آخی

بو گون یامان تیرختورو سئویرم

+ نوشته شده در  دوشنبه 1393/02/22ساعت 18:24  توسط .....  | 

وور چوماغيم وور !

وور چوماغيم وور !

 

گونلرین بیر گونونده، شاه عابباسین دوربونونده:

بير قوجا واريدي، اونون دا بير قاريسي. قوجا اووچولوق ائديب ، اؤزونو ده آرواديني دا دولانديريردي .

بير گون، تور قوروب ، گؤزله‌مه‌يه باشلادي قوجا. تورا يئكه بير لئيلك دوشدو. سئوينه - سئوينه تورون يانينا گليب اونو چيخارتماغا باشلادی. بيردن ديل آچيب دانيشدي لئيلك:

آي قوجا ! من لئيلكلرين شاهي‌يام . بوراخ مني گئديم ، يئرينه هرنه ايسته‌سن وئره‌رم سنه . ائويم او داغين داليندادير . كيمدن سوروشسان سنه گؤرسه‌درلر .

قوجانين اوره‌يي يوموشانيب اونو بوراخدي . بير گوندن سونرا قوجا حاضيرلاشيب لئيلكدن تؤحفه آلماغا گئتدي . آز گئتدي ، اوز گئتدي ، دره - تپه دوز گئتدي . بير قويون سوروسونون يانينا چاتدي . چوباندان سوروشدو :

- بو قويونلار كيميندير ؟

- لئيكلرين شاهي‌نيندير .

قوجا يولونا داوام ائتدي . گئتدي - گئتدي ، قاباغينا بير ايلخي چيخدي . ايلخيچيدان سوروشدو :

- بو آتلار كيميندير ؟

- بونلار لئيله‌ييندير .

- لئيله‌يي  اوولاميشديم من . يالواردي نه ايسته‌سن وئره‌رم مني بوراخ . ايندي اونون يانينا گئديرم . گؤره‌سن اوندان نه ايسته‌سم ياخشي‌دير ؟

- لئيله‌يين بير كوپو وار . اونا « قاينا منيم كوپوم قاينا » دئین كيمي ، قايناييب آغزيندان قيزيل تؤكور . كوپو ايسته.

قوجا يولا دوشدو . آز گئتدي ، اوز كئتدي ، دره - تپه دوز گئتدي ، داغلار آشدي ، چايلار كئچدي . يئددي گون يئددي گئجه يول گئديب لئيله‌يين ائوينه چاتدي . ائوه گيريب سالاملادی.

لئيلك ديمديييني شاققيلداديب دئدي : لياك لياك ! سالام وئرمه‌سه‌يدين ، سني ديمديييمه آليب اودارديم ... يقين تؤحفه داليجا گليبسن . هه دئ گؤروم نه ايسته‌ييرسن ؟ دئ اوتانما .

- سنين بير كوپون وار . همن كوپو ايسته‌ييرم .                

- آي قوجا ! كوپو نئيله‌ييرسن ؟ ياخشي بودور ، سنه بير كوپ قيزيل وئريم ، گئت كاسيبليغين داشيني آت .

لئيلك قوجاني نه‌قدَ‌ر ديله توتدوسا دا ، قوجا راضي اولمادي . آخيردا ، لئيلك كوپو قوجايا باغيشلادي .  

قوجا سئوينجك كوپو گؤتوروب يولا دوشدو .دره‌لردن سئل كيمي ، تپه‌لردن يئل كيمي كئچدي . بير قيشلاغا چاتيب بير تانيشين ائوينه دوشوب دينجلمك ايسته‌دي .

ائو يييه‌سينه دئدي : گؤزوز بو كوپون اوستونده اولسون ، من بير آز ياتيم .آنجاق اونا « قاينا كوپوم قاينا » دئمه‌يين ها ! .

قوجا ياتدي . ائو يييه‌سي كوپه ياخينلاشيب قيشقيردي : قاينا كوپوم قاينا . كوپدن قيزيل قايناييب داشدي . او قيزيللاري ييغيب مؤعجوزلو كوپو گيزله‌ديب ، يئرينه اونا اوخشايان باشقا بير كوپ قويدو .

قوجا آييليب كوپو گؤتوروب يولا دوشدو . آز گئتدي ، اوز گئتدي ، تانيش يوللاردان اؤتدو . يئددي گون يئددي گئجه يول گئديب ائوينه چاتدي. آروادينا دئدي : هه قاري تئز اول سيفراني سال ، اينديجه قيزيل ياغيب وارلاناجاغيق .

قاري سيفرا ساليب قوجا كوپو اورتايا قويوب وار گوج ايله قيشقيرماغا باشلادي : قاينا كوپوم قاينا ! كوپ قاينامادي . قوجا يئنه ده قيشقيردي سا كوپدن قيزيل چيخمادي .قوجا حيرصله‌نيب داها قيشقيردي : سني گؤروم لعنته گله‌سن ، آي لئيلك ! . مني آلداتيبسان ، ايسته‌ديييم كوپو يوخ ، آيريسيني وئريبسن .

بير گون سونرا، قوجا يوللانيب يئنه ده ايلخيچي‌نين يانينا گليب دئدي : لئيلك مني آلداديب ايندي اوندان نه ايسته‌ييم ؟

ايلخيچي فيكيرله‌شيب دئدي : اونون سئحيرلي بير سيفراسي وار . دئسه « آچيل سيفرام آچيل » او ساهات آچيلاجاق ، جور به جور دادلي يئمك‌لر دوزوله‌جك . همن سيفراني ايسته .

قوجا لئيله‌يين ائوينه گيريب يئنه ده ادبله سالاملادي . لئيلك دئدي : كئچن يول قاينايان كوپومو سنه وئرديم ، ايندي نه‌يه گليبسن ؟ يوخسا اوندان راضي دئييل‌سن ؟

قوجا باشينا گلني دانيشيب دئدي : سن مني آلداتيبسان قاينايان كوپ يئرينه ، قايناماياني وئريبسن . ايندي گره‌ك مؤعجوزلو سيفراني وئره‌سن . لئيلك فيكرله‌شيب سيفراني اونا وئردي . قوجا آليب گئري قاييـتدي . آز گئتدي ، اوز گئتدي ، دره تپه دوزگئتدي . دره‌لردن سئل كيمي ، تپه‌لردن يئل كيمي كئچيب يئنه همن قيشلاغا چاتدي . همن تانيشين ائوينه گليب دئدي : آل بو سيفراني ياخشي ساخلا ، بير آز دينجليـم . چوخداندي يوخوسوزام بلكه بيرآز مورگوله‌ديم . آنجاق دئمه « آچيل سيفرام آچيل » .

قوجا تزه‌جه يوخويا گئتميشدي ، ائو صاحابي دئدي : « آچيل سيفرام آچيل » . او ساهات سيفرا آچيليب اوستونه يئتميش بويا دادلي يئمك دوزولدو . هاميسيني سيفرانين ايچينه ييغيب آغزيني باغلادي . او بيري اوتاغا آپاريب اونون يئرينه اوخشايان  سيفرا قويدو . قوجا يوخودان آييليب سيفراني گؤتوروب يولا دوزه‌لدي . ائوينه گليب آروادا دئدي : هه آرواد ! بو يول اوره‌ييندن نه كئچسه اونا قوناق ائله‌يه‌جه‌يم .دئ گؤروم نه ايسته‌ييرسن؟ بو ساهات حاضيرلاييم . قوجاق سيفراني آچيب قيشقيردي : آچيل سيفرام آچيل .

نه قدَ‌ر قيشقيردي سا دا ، بير زاد اولمادي . قوجا حيرصله‌نيب دئدي : بو لئيلك ايكينجي يولدور مني آلدادير . صاباح يئنه گئده‌جه‌يم اونون يانينا ، باشقا بير زاد ايسته‌يم .

او بيري گون ، قوجا آلا قارانليقدا يئنه لئيله‌يين يانينا يوللاندي . ايلخيچينين يانينا گليب باشينا گلني اونا دانيشدي . ايلخيچي دئدي :

بئله گؤرورم سنين دوشمانين چوخدور . لئيلكدن اؤزو دؤيه‌ن چوماغي ايسته . يامان دردينه دَ‌يَر . بونا « وور چوماغيم وور » دئين كيمي قاباغيندا كيم اولسا هاميني ازيب داغيداجاق .

قوجا لئيله‌يين ائوينه گيريب سالاملادي . لئيلك دئدي : بو يول نه ايسته‌ييرسن ؟ قاينايان كوپومو سئحيرلري سيفرامي آلدين ، ايندي نه ايسته‌ييرسن ؟

قوجا دئدي : بو يول دا مني آلداتدين . باشقا سيفرا وئردين . ايندي اؤزو دؤيه‌ن چوماغي ايسته‌ييرم . لئيلك دئدي : اون ايسته‌ييرسن ؟ او منه لازيم دئييل ، گؤتور آپار .

قوجا چوماغي گؤتوروب گئري قاييتدي . آز گئتدي ، اوز گئتدي ، دره - تپه دوز گئتدي . همن قيشلاغا چاتدي . تانيشينين ائوينه گئديب دئدي : بو چوماغي برك ساخلايين ، بلكه من بير آز ياتام . آنجاق « وور چوماغيم وور » دئمه‌يين ها ! .

قوجا هله درين يوخويا دالماميشدي ، ائو يييه‌سي سسله‌دي : « وور چوماغيم وور » . چوماق دا ائوده‌كيلرين هاميسيني وورماغا باشلادي . هاي - كويه قوجا يئريندن قالخيب ائو يييه‌سينين يانينا قاچدي . ائوده‌كيلر قوجاني گؤره‌ن كيمي آغلاشا - آغلاشا يالوارماغا باشلاديلار :

- چوماغي ساخلا ! سنين كوپونو ده سيفراني دا بيز گؤتورموشوك . بيزي باغيشلا هاميسيني قايتاراريق آنجاق بو چوماغي ساخلا .

قوجا قيشقيردي : چوماق دايان ! چوماق داياندي .

كوپو سيفراني گتيرديلر . قوجا اوردان چيخيب يوللاندي . آز گئتدي ، اوز گئتدي ، دره تپه دوزگئتدي  . داغلار آشدي ، چايلار كئچدي . يئددي گون يئددي گئجه يول گئديب اؤز ائوينه چاتدي .

كوپو يئره قويوب قيشقيردي : قاينا كوپوم قاينا ! كوپ قايناييب داشدي . قزيللار يئره تؤكولدو . قوجا ايله قاري بونلاري ييغيشديريب قورتارا بيلمه‌ييرديلر . سونرا قوجا دئدي : آچيل سيفرام آچيل ! سيفرا آچيليب يئتميش بويا دادلي يئمكلرله دولدو . قوجا ايله قاريسي عؤمورلرينده بئله يئمكلر گؤرمه‌ميشديلر .

چوخ كئچمه‌دن خانين قولاغينا چاتدي ، قوجا اووچونون الينه هاردانسا سئحيرلي كوپ ايله سيفرا كئچيب . خان وزيري قوجانين يانينا گؤندردي . وزير قوجايا دئدي : كوپ ايله سيفراني خانا وئرمه‌لي‌سن !

قوجا يالنيز دئدي : وور چوماغيم وور ! وزير اؤزونو قوجانين ائويندن بير تَهر قورتاريب چيخيب قاچدي . ايشي بئله گؤرن خان ، قوشون چكيب قوجانين ائوينين قاباغينا ييغدي :

هه قوجا ! هنرين وارسا چيخ باييرا ، دؤيوشك . قوجا ائوين قاپيسيني آچيب قيشقيردي : وور چوماغيم وور ! چوماق قوشونو ازيب داغيددي . آخيردا خانين اؤزونه چاتدي . خان باغيردي : قوجا آماندير چوماغيني ساخلا ! سندن هئچ نه ايسته‌مه‌یيرم . قوجا گولدو : ياخشي آنجاق داها گؤزون يوخسوللارين ماليندا اولماسين .

قوجا اووچو آرزيسينا چاتيب قاريسي ايله خوش ياشاديلار .  

عبدالكريم منظوري خامنه . محبت داستانلاري ، نشر ياران ، 1364  ، تبريز ( بیر آز دَییشمیشم )

 

+ نوشته شده در  یکشنبه 1391/03/28ساعت 11:32  توسط .....  | 

قورداگؤرستمک

قورداگؤرستمک

بئله روایت ائله ییرلر شاه عابباس جنت مکان ، ترازییه وئردی تکان ، ایکی قوز بیرگیردکان.

گئتمیشدیک باغا ، گؤزوم بیرگوله دوشدو. سیاه سونبوله دوشدو. دونيا دولاندی بیزیمکی ده بئله دوشدو.

بیرنلبکی بیرنابات. یوخون گلیرباشین قوی یات . محمد (ص ) جمالینا بیر صلوات.

گونلرین بیرگونونده ، شاه عابباسین دوربونونده:

فیریلداق بیرشاه ، وزیرینی سریمک فیکیرینه دوشدو بیر گون.

- وزیر!

- بلی قوربان! بویور باشینا دولانیم ، قوربانین اولوم ،قیبله عالم ،یئرین آللاهی ، باشیمین تاجی ...

- یامان سئویرم بو یالان سؤزلرینی ، چوخ دئنه اسکیک.

- سن  بیزیم آتامیزسان. سنسیزیئتیم قالار وطن . قاراگئیردونیا . دایاغی سنسن عالمین . آغاسی سنسن کاییناتین . صاحابی سنسن دوننین بو گونون صاباحین ...

-  داهابسدی . قولاق آس آخماخ کیشی! بیر قوزو وئره‌جه‌یم سنه . اوچ آی سونرا اونو  وئردیییم کیمی ایسته‌ییرم. آغیر–یونگول اولسا قولاغینی کسرم سنین.

- باش اوسته قوربان .

فیکره جومدو وزیر ، آخی نئیله‌سین؟ یئدیدسهکؤکه‌له‌جک.یئدیدمه‌سه آریقلایاجاق. نئچه گون اؤزقارنی له دانیشیر وزیر.سارایین قوجاچوبانیندان سوروشدو سؤزو.

- آی قوجا! اؤلوم دادلی بیرقزوو–قَدَره توش گلمیشم . نه تَهَر بیر قوزونو اوچ آی ساخلاییم آریقلاماسین کؤکه‌لمه‌سین ؟ 

- باشینادولانیم! چوخ یونگولدور بو سؤز. بیر هفته دویونجا یئدید، هفته باشی اونو قفسده کی قورداگؤرست . ارییر بوتون ییغدیغی اتلری قوربان !

 

+ نوشته شده در  یکشنبه 1391/03/28ساعت 11:31  توسط .....  | 

سن کی چئری سن!

سن کی چئری سن!

ایکی اولدوزگؤروشوب دانیشارکن خئییردوعا وئریرقیزینا کوره‌کنینه بیرآتا. شنلیک پایلانیردونیایا.   بَی-گلین پیچیلداشیب گولورلر. ساری تئل اوخویور ، لزگی اوینايیر محله. « قول- بویوندولار قوجالار اوزاق خاطیره‌لرله، سوبایلار صاباحا سئوگی دریرلر» . قورتولور توی.

باشلانیر باشقا یاشاییش.

هر گون ائوه گیرنده کیشی، گوللرآچیلیربهشتده. باشینا دولانیب الیندن آلیرچؤره‌یی ناری، مارال. یاواش-یاواش جیبی بوشالیرکیشی‌نین.

بیر گون الی آیاغیندان اوزن گیریرائوه. مارال قاچیر پئشوازا. بوش الینه سونرا اوزونه باخیب دویوخور. 

- آی کیشی! سن کی چئری سن!هئش سنی بئله گؤرمه‌میشدیم. من سنده اوتورمایاجاغام.

+ نوشته شده در  یکشنبه 1391/03/28ساعت 11:25  توسط .....  | 

يا رب ارحم

آدام آدام اولاندان ، سني آختاريب بهشتدن چيخدي

ياغيشا داشا قانا بلشدي سنين يولوندا.

سن سايسيز آداملارين سئوگيليسي سن.

هئش ده جيجيييم گلمه‌يير

يامان گؤزلسن آخي.

سنين دونوندا خوخانلار ، آز اولماييبلار. 

اوزو بزك ، ايچي تزك فيكيرلر

يا رب ارحم من راس ماله الرجا

+ نوشته شده در  پنجشنبه 1391/03/04ساعت 10:46  توسط .....  | 

گلن گئدنلر

داياديلار دووارا اونو

گلن گئدنلر

باخماديلار آغلار گؤزونه

آغ گؤيرچين قانا بلشدي.

محمد رضا احساني جنابلارينا تقديم.

+ نوشته شده در  پنجشنبه 1391/03/04ساعت 10:39  توسط .....  | 

محبتین سیرری

گونلرين بير گونونده ، شاه عابباسين دوربونونده:

بير كند، اكينچي آليش وئريشچي، نه بيليم نوزول خور، خان، دين آدامي، آيريلاري.

- آي باجي! اريم آدام دئييل سانكي. گونلر چؤلده باييردادير، ائوه قاييداندا دانيشديرماق اولمايير اونو. يامان يوووز اؤلولره- ديري‌لره، ديل ياراسي، كؤتك عادتيم اولوبدور. مندن اوشاق ايسته‌يير. هارادان اشاق گتيريم آي باجي!؟ ايت- پيشيك كيمي داييم بوغوشماداييق بيز. هردن اونو خوش دانيشديرماق فيكيري هوه‌سي، يامان اويانير منده. آمما يارالاريم گؤينه‌ييب اوره‌ييمي نوخدالاييب آتيشيرام يئنه ده. گونو گوندن اوزاقلاشيرام اوندان. بير ائوده، بير اوتاقدا، بير ياتاقدا تك ياشاييريق بيز. يامان آجي‌دير بو حيس. آداملارايچينده يالقيزليق، قوربت. دردلي ده دئيينگن اولار قيناما مني. دونن سيچان داواسي آلديم اؤزومه اونا. قورخدوم آي باجي! هردن چوخ قيسسا، گؤزونده سئوگي گؤرورم، آمما يامان تئز سئوگي ايتير نيفرت دالغالاريندا. آي باجي! آي باجي! اؤلورم بو گونلر. آخي ائولننده قولاغيما سئوگي دئميشدي او، اوره‌ييمه محبت.

- آغلاما آي باجي! كيش‌لرين ديليني تاپاسان گرك.تاپسان بهشت اولار ياشاييشين، تاپا بيلمه‌سن...

- سن بيليرسن ديللريني؟

- من ده سنه تاي. چوخداندي چكيرم اريمدن. آمما بو دردين داواسيني فاطما باجي بيله شايد. بورادا هاميدان عاغيللي، هاميدان مؤهروبان اودور.

دردلي آرواد يوللاندي فاطما باجي‌گيله.

- سلام.

- عليك سلام.

- جهره اَييريرسن نييه گون قاباغيندا. ايستي سو، قورو چؤرك ندندير؟

- من كؤلگه ده، سرين سو ، ياغلي چؤرك يئسم، اونون زحمتيني بيله‌بيلمه‌يه‌جه‌يم يقين.

- فاطما باجي! باخ جهنمده ياشاييرام. نئيله‌ييم بيلمه‌ييرم. اؤيرت منه كيشي‌لرين ديليني.

- شرطيم وار.

- دئنه.

- اورماندا آسلان وار. اونون بير توكو.

- نه دئدين؟ آسلانين توكو؟

- هه. گتير اؤيرن كيش‌لرين ديليني.

يولا دوشدو. اورمان آسلان. اؤلوم واردير اورادا، آمما بو ائوده گونده مين يول اؤلور. گتيرملي‌دير توكو. صاباح كيشي چؤله، آرواد اورمانا.

اوزاقدان گؤردو. اوره‌يي اوزولدو. قورخا- قورخا ات پارچاسيني توللادي اونا. اوتوردو باخدي. اتي يئييب گئتدي آسلان. صاباحلار ات حؤرمتلي باخيشلار. بير گون اتي ياخيندان وئردي اونا. اليني چكدي باشينا- قولاغينا قورخا- قورخا.اؤزونو بوراخدي اونون اللرينه ييرتيجي آسلان. قوپارتدي بير توكونو.

ائوه قاييداندا دشوندو سؤزو.

صاباح سحر دئييب گولمك سسي چولقادي، اؤلوم ماهنيلي ائو- ائشييي.       

قيش 90

                          

+ نوشته شده در  چهارشنبه 1390/12/17ساعت 19:36  توسط .....  | 

میلاخ

milax
 
bismillahirrəhmanirrəhim
allah sənə təvəkkül
....bir bele adam
?indi neyləyim
mənənə allahın əmridi
düyməni vurdu
beş adam can üstədir goydə
.əlhəmdulillah bugunundə çörəyi çıxdı
+ نوشته شده در  شنبه 1390/10/03ساعت 16:46  توسط .....  | 

سلام به شاگرد ديروز , هكر امروز

سعيد آغا!

تانيديم سيزي. باقر صدر ده، اول كلاسيندا ....

كلك كلك ....

 آمما ايشيز  فايدالي اولدو منه.

هك اؤيرنمك فيكرينه دوشدوم.

سؤزون گيلئيين اولسا،دانيش منله.

يولونو گؤزله ييرم.

حسام

+ نوشته شده در  شنبه 1390/10/03ساعت 16:6  توسط .....  | 

آه

 آه

 گونلرین بیر گونونده، شاه عابباسین دوربونونده:

بیر تاجیرین اوچ قیزی  واریدی، دار دونیادا. بونلارین ایسته­دیینی ایکی ائله­مزدی هئش واخت. بیر گون

- گؤزل قیزلاریم! اوزون سفره چیخمالیییام من. اوره­یینیز ایسته­ینی دئیین آلیم سیزین اوچون.

- منه بیر گؤزل دون.

- منه یاخشی جوراب.

سون بئشیک قیز: گول، تئللریمه تاخماغا.

- گؤزلر اوسته بالالاریم!دوعا ائدین یاخشی اولسون سفریم.

یوللاندی تاجیر. قاییتدی اوچ آی سونرا. ائوه گیررکن جومالاشدیلار قیزلار آتانین باشینا، « به هانی منیم کی؟ » سؤزو قولاغی باتیریردی.

- آل بو سنین دونون.

- بو دا سنین جورابین.

- به منیم کی هانی؟

توتولدو تاجیر. گول آلماغی اونودموشدو آخی. بیر آه چکدی دریندن. چالیندی قاپی او زامان. بیر کیشی الینده بیر قیزیل گول .

- کیمسن؟

- آه. گول گتیرمیشم بالاجا قیزینین تئللرینه.

یامان سئویندی تاجیر. گوله- گوله قاییدیب قیزا وئردی گولو. یامان سئودی اونو.

اوچ گون سونرا چالیندی قاپی. آه گلمیشدی یئنه ده.

- گولون یییه­سینی آپارماغا گلمیشیم.

- آتان یاخشی آنان یاخشی. گل واز کئچ بوندان.

- اولان دئییل. آپارمالیییام اونو.

چاراسیز قالیب آتا، قیزی تاپشیردی اونا. آه قیزین گؤزلرینی باغلاییب آتین ترکینه آلیب یولا دوشدو. بیر آز سونرا یئتیشدیلر. قیزین گؤزلری آچیلاندا دیب- بوجاقسیز جنت سایاق بیر باغ گؤز اوخشادی.« بورا سنین ائویندیر » آه دئدی.


ادامه مطلب
+ نوشته شده در  دوشنبه 1390/09/21ساعت 16:40  توسط .....  | 

اؤلوم-چؤرک : متن کامل

باشلانيش

 

اوشاغيم دؤرد – بئش ياشيندا اولاندا ، اونا ناغيل دئمك ايسته‌ديم . چوخلو گوجنديم سه بير زاد تاپيب دئيه بيلمه‌ديم . بئينيمين ديب - بوجاغيندا  اولان ناغيللاري ، آغير توز – دومان باسيب ايتيرميشدي . رحمت‌ليك بؤيوك آنامين ناغيللارينين شيرين‌لييي ياديمدادير اؤزلري يوخ . باشارماديم اؤز گوجسوزلويومه اينانديم .

رحمت‌ليك « صمد بهرنگي » نين « افسانه‌هاي آذربايجان » آدلي كيتابيني گؤتوردوم . فارسجا يازيلميش ناغيللاري ، توركجه‌يه چئويريب ، اونا دئديم . گؤزوم فارسجا گؤره‌ركن ديليم توركجه دئدي .

اوشاقدان آرتيق ، منه ياپيشدي . دئيه - دئيه ، اوزاق خاطيره‌لريمده ، بؤيوك آنامين ديزي اوستده باشيمي قويوب ناغيللاري ائشيده - ائشيده يوخلاديم . نه يامان سؤيله‌نيلمز كئف !

ناغيللاري دئيه - دئيه دوشوندوم بو سؤزلري قاباقجا ائشيدميشم ، ايندي نه اولاجاغي بيليره‌م :

ناردان چيخان قيز ديري قالاجاق ، جيرتدان ياتمـاياجاق و صبير داشي……..   

         آنجاق اونا يوخ ، اؤزومه ناغيل دئييــرديم . ياديما دوشور :

بؤيوك آنام دئيه‌نده « بورادا قالسين صاباحاجان » واخت گلينجه ، ده‌ده‌ميز ياناردي . اؤز خياليميزدا ،‌ ناغيلين قالانيني قوشارديق و صاباح گئجه فيكريميزين دوز يوخسا يانليش اولماغيني باشا دوشرديك .

ناغيلين سونو ، همشه بئله‌نچي ايدي  :

گؤيدن اوچ آلما دوشدو

بيريني من يئديم

   بيريني ناغيل دئيه‌ن يئدي

     بيريني بورادا ، هاميدان ياشلي يئدي .

و بيز حسرت قالارديق : گؤره‌سن بير گون بو آلمالاردان بيريسي  بيزه يئته‌جك مي ؟  

محمد حسام

 

 

 

 


« اؤلوم - چؤره‌ك »

 

عؤمرونو نئيي له

       بؤلوشن چوبان

          گون اورتا چاغي

يام - ياشيل آغاجين

       سرين كؤلگه‌سينده

          سيرريني درديني ، چؤللره يايير .

گئديشدن قاليبدير ، دوم - دورو  چايلار

       يئر - گوي  بو نغمه‌يه ، يئنه وورولوب

          كيرپيك ده وورمور گؤزه‌ل دورنالار

داغ كؤچوب ديزه

       آلاولو سسي

          ديل - دوداغيندا  

               گزديرير مودام :

«‌ سودان گله‌ن

سورمه‌لي قيز

       سودان گله‌ن سورمه‌لي قيز .....  »


ادامه مطلب
+ نوشته شده در  دوشنبه 1390/08/30ساعت 18:10  توسط .....  | 

دستفروش

همشه كي اويون باشينا گلدي

دويوخدو كيشي

اهمال يولا دوشدو

آروادي دؤهدوره......

اوشاغا كيتاب.......

شهرداري مامورو ائوين ييخيلسين.

ياز۹۰ 

+ نوشته شده در  شنبه 1390/08/28ساعت 17:53  توسط .....  | 

ياريق بالا

داريخما قيزيم

من بوردايام.

دولانماغا گئديب آنان

بو تئزلييه گلمه يه جك.

گؤزل قيزيم بيليرسن نه دئييرم؟

چوخ سئويرم سني بالا

                 سن ده مني.

او بيرداها بيزه گلمز

اؤتور اونو

             اونوت اونو.

بيلدين بالا؟

  بير ساهاتدي دانيشير كيشي

قيزين آغزينين ان شيرين واختيدير

بستني يالايير گوله گوله دادگستري قاباغيندا.

ياز۸۹

 

+ نوشته شده در  شنبه 1390/08/28ساعت 17:11  توسط .....  | 

گول-گولله

بیر کؤكدندير

گول

گولله.

هر يارادان بير گول آچير

گولو گولله له ينده.

ياز۹۰

 

+ نوشته شده در  شنبه 1390/08/28ساعت 17:5  توسط .....  | 

حاق

دونن كسديلر اونو

توو-تله سيك بؤلوشدوردولر اتيني

سينديرديلار سومويونو

بيرينه آز

بيرينه چوخ يئتيشدي

                              قوربانليق پايي.

حاق منيمدي

حاق منده دي

حاق منمدي

             دئديلر هامي.

دوز دئيير هامي

يالان دئيير هامي

حاق بوتونلوكله هئش كيمده دئييل.

قيش ۸۹ 

 

+ نوشته شده در  شنبه 1390/08/28ساعت 16:47  توسط .....  | 

آبا

نوح پیغمبرله یاشیت اولان گنج ، قرینه لر ساغ سالامات یاشامیشدی. ماهنیلاری ناغیللاری دیلدن- دیله، ائلدن- ائله گزدیکجه داها سئوینیب اوجالیب سهنده ساوالانا بوی دئمیشدی بیزیم «آبا». شاهلار گلیب گئتمیش اولدو، آمما آبا شاق -

شاق شاققیلداییردی.

آمما  بیردن توفنگ گلدی. سؤزونو ائشیدن اولمادی داها. اوره یی اود ، نفسی چیخماز داغلار کیمی آز قالیردی دیغلاسین پارتلاسین آبا. باشلادی دونیانی دولانماغا. اوخودو ناغیللارینی داغا - داشا، قارا یاغیشا ،  دره­یه - بولاغا . اودور طبیعته باخاندا، آبانین سسی اوره یمیزی اوخشاییر و شَهَر توستوسونو دادمایان کند آداملاری،

یاخشی تانیییرلار ناغیللاری.

توستودن یامان یورخوردو آبا، شَهَره گیره­ییلمیردی آنجاق. بیر گون آبا  « آخی شَهَر آداملاری هاچاناجان بیلمه­مه­لی دیرلر؟ » دوشونوب اؤلومونو گؤزونه آلیب گیردی تبریزه. سینه سی توتولدو  آیاقلاری سوروندو. « بیرینی تاپیب سؤزومو اونا دئییب اؤله­جه­یم » فیکری له، قره داغ نشانه لی  بیر ائوه گیردی. مین ایلللیک ناغیللاری بیر گئجه ده منه دئمه­یه باشلادی.

یاواش- یاواش سوزالدی آبا. قوجالدی آبا. ناغیللار ایچینده گاهدان قاققا چکیب گؤزلرینین ایچینه­ جن گولوردو. گاهدان سس-سمیرسیز، بیر بوجاغا باخیب جوموردو اؤزونه، آغلاییردی ایچینده. 

ناغیللار قورتولماقدا « داها من اؤلمه­یه­جه­یم اوغول! یاشایاجاغام دونیا وارکن » دئییب آلنینمدان اؤپدو، الیندن اؤپدوم، گؤزلری دولدو، اوره­ییم دولدو. سون ناغيليني اؤلوم قولاغينا پيچيلداييب قورتولدو آبا.

یئتیم اولدو آرخام-ائلیم.

یئتیم اولدو قوشما بایاتی، ناغیل گرایلی.

هارداسان آبا؟              

هارداسان آبا؟              

قیش  ۱۳۸۹

+ نوشته شده در  چهارشنبه 1390/05/19ساعت 11:3  توسط .....  | 

قیرات:اؤن سؤز- ایلقار جنابلاری

 هو

« گزديگيم چنلي بئل »

 

قهرماني اولمايان ائل يازيقدير و داها

يازيقدير قهرمانا احتياجي اولان ائل .

« برتولت برشت »

 

افسانه‌لرين كئچميش چاغلارا باغلي اولدوقلارينا باخماياراق تؤره‌نديكلري ، انسـان  گله‌جه‌ييني  سـاهمانلاماق  اوچون اولموشـدور . ميرچا اليـاده دئميشكن « انسان افسانه ايله آرخايينليغا چاتير . او گؤره‌جه‌يي ايش قاباقجا گؤرولوبدور . باشقا عبارتله ، افسانه شوبهه‌لره غلبه چالماقدا انسانا يارديم ائدير ؛ دنيز سفريندن نه قورخور نه ده حئيرته دالير چونكي اؤنجه افسانه‌وي قهرمان افسانه‌وي چاغدا بو سفره چيخيبدبر . » [1]

انسانا آرخايينليق باغيشلايان بئلنچي قهرمانلاردان بيري قوچ كوراوغلودور . آنجاق او افسانه‌وي يوخ بلكه تاريخده ايزي پارلايان گئرچك بير شخصيت اولاراق ظولمه اوغراميش يوخسول كوتله‌لر اوره‌يينده يوكسك يئر توتوب گون به گون افسانه‌لشميشدير و بؤيوك سعادت دير تاريخدن افسانه‌يه كؤچمك .

« كوراوغلونون گوجو ، خالق كوتله‌لرينين گوجو دئمكدير ؛  بوتون گوجلردن اوستون اولان توكنمـز بير گوج . اونون ان بؤيــوك اؤزه‌لليگي همين گوجه سؤيكنديگي و اينام بسله‌ديگي دير . » [2]


ادامه مطلب
+ نوشته شده در  شنبه 1390/04/25ساعت 21:34  توسط .....  | 

خان دایی

سوموردو دوداغین

آلیشدی اوره یی

توستولر ایچینده

قورتولدو دایی.

 

+ نوشته شده در  چهارشنبه 1389/10/08ساعت 13:6  توسط .....  | 

پیچاق

اوی گؤزونو

وور قولونو

قیچینی دا....

قورتولمادی بو ساللاخلیق.

بسدیر داها

قولدور آغا!

جان اوستده دیر

شئعیر بالام.

 

+ نوشته شده در  پنجشنبه 1389/09/11ساعت 14:47  توسط .....  | 

ایشیق قبیر

تک لییی دادیرام

یاندیرمیشام چیراقلارین هامیسینی ، قارانلیق گیزله نه بلکه

سحره جن یالان تلویزیوندان قورتولانمیرام

تورپاقدان آییریر بیر تنیک پتو ، سینیق هئیکلی

اوشویور اوره ییم

قیزیشیر هردن

سانکی قویلانمیشام ایشیق قبیرده

سحر اولدو، یئنه خوتداییرام من.

یاز۸۹

+ نوشته شده در  شنبه 1389/09/06ساعت 19:16  توسط .....  | 

غریب

یامان غریب

یامان تانیش

اهمال بیر سس

کیمدیر آللاه

بلکه منم

بیلمه ییرم

چوخداندی آخی اؤز-اؤزومه ده دانیشمامیشام

+ نوشته شده در  شنبه 1389/09/06ساعت 19:12  توسط .....  | 

شک

گولومسه ندي منه ايري گؤزلري

                                  قاچدي دوداغي

                                         پارلادي آغ ديشلر

ياردي سينه مي

قانيمي يالاييب

                  ايچين چكيردي.

ايندي بيري گولومسه ننده منه

يارالاريم آجيشير

ياي ۸۹

 

 

+ نوشته شده در  چهارشنبه 1389/06/31ساعت 20:27  توسط .....  | 

مطالب قدیمی‌تر